تاند (سه شنبه، د قوس ۱۱) اروپايي ټولنه وايي چې د ګلخانه يي او چاپېریال ککړوونکو ګازونو د تولید په کمولو کې د دوی طرحې مثبتې پایلې لرلې دي.
د اروپایي کمیسیون له لوري په تازه خپاره شوي راپور کې راغلي چې د اروپايي ټولنې د غړو هېوادونو ترمنځ له ۱۹۹۰ تر دې دمه پورې د ګلخانه يي او نورو زهري ګازونو او چاپېریال ککړونکو توکو په تولید کې ۲۴ سلنه کموالی راغلی دی.
سرچینه کاږي چې دا د پام وړ شمېره ده او هڅه کېږي چې تر ۲۰۵۰ز کال پورې د یادو ګازونو تولید صفر ته راښکته کړل شي.
اروپايي ټولنې پر نورو هېوادونو هم غږ کړی چې د ځمکې د ساتلو لپاره د چاپېریال په ساتنه کې خپل اقدامات جدي او ډېر کړي.
د چاپېريال ککړتيا یو له هغو مواردو څخه ده چې په دې وروستیو کې د ټولې نړۍ پام را خپل کړي او که چېرې پام ورته ډېر نشي ښايي بشري ناورين رامنځته کړي.