تاند(سه شنبه، د قوس ۱۱) ناټو وایي له افغانستان د وتلو یا پاتې کېدلو لپاره باید پور پرې کړو.
د ناټو عمومي منشي ینس سټولټنبرګ په تازه څرګندونو کې ویلي چې د امریکا له منتخب ولسمشر جو بایډن سره یې د افغانستان په اړه خبرې کړې دي.
د نوموړي په وینا دواړو لورو په سیمه کې پر روان وضعیت او همدا راز له دغه هېواد د سرتېرو پر ایستلو بحث کړی.
ینس سټولټبرګ وایي ناټو که په افغانستان کې پاتې کېږي نو دې ته باید تیاره وي چې د جګړې مالي او ځاني لګښت پرې کړي او که له دغه هېواد وځي نو بیه یې بیا د تېرو لاس ته راوړنو له لاسه ورکول دي.
ینس سټولټنبرګ ټينګار کوي چې په افغانستان کې د ناټو او امریکا د ماموریت د پای ته رسولو لپاره بېړه نه ده په کار.
سټولټنبرګ داسې مهال دغه څرګندونې کړې چې ټاکل شوې ژر د ناټو د بهرنیو چار وزیرانو غونډه وشي او په هغه کې هم د افغانستان په اړه خبرې وشي.