تاند (یک شنبه، د قوس ۹) د لغمان ولایت امنيتي چارواکي وايي د دې ولایت په دولت شاه ولسوالۍ کې د افغان ځواکونو په عملیاتو کې ۴۷ وسله والو طالبانو ته مرګ ژوبله اوښتې ده.
د والي ویاند اسدالله دولتزي تاند وېب پاڼې ته وویل چې، دا عمليات تېره ورځ ناوخته ترسره شوي دي.
نوموړی وایي په دې عملياتو کې د طالبانو د استخباراتي مسوول او ۶ سیمه يیزو قوماندانانو په ګډون ۳۰ طالبان وژل شوي او ۱۷ نور ټپيآن شوي دي.
نوموړی وایي په وژل شویو کسانو کې دولت شاه ولسوالۍ لپاره د طالبانو د استخباراتو مسؤل قاري همت او د دوی ۶ تنه سيمه يیز قومندانان حلیم ، نجیب الله ، طوفان، قدرت ، مالک او فراشغاني هم وژل شوي دي.
د هغه په خبره په دې عملياتو کې ملکيانو او افغان ځواکونو ته زيان نه دی اوښتی.
بل لورته وسله والو طالبانو هم تراوسه په دې اړه رسنيو ته څه نه دي ویلي.