تاند (شنبه، د قوس ۸) د ولسي جرګې غړي وایي د ولسمشر په ګډون دې د حکومت لوړپوړي چارواکي د سولې پروسې پر وړاندې خنډونه نه جوړوي.
د یادې جرګې ګڼو غړو یو ځل بیا د ولسمشر د لومړي مرستیال امرالله صالح پر وروستیو څرګندونو چې ویلي یې وو، د ولسي جرګې غړي مفسد دي خپلو غبرګونونو ته ادامه ورکړې ده.
دوی وایي حکومت دې په لوی لاس د درې ګونو قواوو ترمنځ نفاق نه رامنځ ته کوي او ښه به وي چې ټول اړخونه پر سوله تمرکز وکړي.
د ولسي جرګې د غړو په خبره د افغانانو لپاره دمګړی لومړیتوب سوله ده او ټولو ته په کار ده چې له دې پروسې سره همکاري وکړي.
وکیلانو همدا راز ټینګار وکړ چې د ولسمشر په ګډون دې د حکومت ټول لوړپوړي چارواکي د سولې له پروسې سره مخالفت نه کوي.
وکیلانو دغه راز وویل چې حکومت باید د سولې په راتګ کې هڅې ډېرې کړي.
دوی وایي هغه کسان چې د سولې مخالف دي دوی په حقیقت کې د افغانانو د غوښتنې مخالف دي او باید د افغانانو ارادې ته درناوی وکړي.