تاند (شنبه، د قوس ۸) په افغانستان او عراق کې د وضعیت د کنټرول لپاره د امریکا سترې نظامي بېړۍ فارس خلیج ته رسېدلې دي.
د امریکایي رسنیو د راپورونو له مخې د امریکا یوه ستره بېړۍ چې، د الوتکو د لېږد وړتیا لري له یوه ډله وړې جنګي بېړۍ سره منځني ختیځ ته نږدې په اوبو کې ځای پر ځای کېږي.
امریکایي رسنۍ وايي د دغه سترو بېړیو د ځای پر ځای کولو ستره موخه دا ده څو له افغانستان او عراق څخه د سرتېرو تر ایستلو وروسته وضعیت کنټرول کړي.
دغه بېړۍ لسګونه جنګي الوتکې لېږدوي او د سیمې د څار وړتیا لري.
سرچینې وایي د دې احتمال هم شته چې د امریکا دغه پرېکړه د ایران له سخت غبرګون سره مخ شي.
تر دې څو ورځې وړاندې امریکا منځني ختيځ ته خپلې څو بي دوه پنځوس جنګي الوتکې هم لېږلې دي.