تاند(جمعه، د قوس ۷) د امریکا د بهرنیو چارو وزیر مایک پومپیو وايي ولسمشر ډونالډ ټرمپ نه غواړي چې امریکایي سرتیري په هغو سیمو کې پاتې شي چې شتون یې د امریکا لپاره ګټه نه لري.
پومپيو له فاکس نیوز ټلویزیون سره له افغانستان د امریکايي سرتېرو د ایستلو په اړه ویلي، چې د امریکا د امنیت تامین د دې هېواد د عسکرو په شمېر پورې اړه نه لري او امریکايي ځواکونه د دې هېواد پر وړاندې هر ګواښ ته ځواب ویلی شي.
نوموړي ویلي، چې د دوحې تړون څخه وروسته په افغانستان کې د امریکايي ځواکونو پر وړاندې ګواښونه د پام وړ کم شوي دي.
هغه زیاته کړې ده چې په افغانستان کې د تاوتریخوالي کچه لاهم لوړه ده.
پمپیو داسې مهال دا څرګندونې کوي چې د تیرو دوو میاشتو راهیسې په قطر کې د سولې بین الافغاني مذاکرات پیل شوي دي چې تر اوسه کومې نتیجې ته رسیدلې نه دي، خو په افغانستان کې د طالبانو تاوتریخوالی لا هم دوام لري.