تاند (چهارشنبه د قوس ۵) په تورخم ښارګوټي کې ۲۰ تنه د باج اخیستنې او کمیشنکارۍ په تړاو نیول شوي دي.
د کورنیو چارو وزارت وايي، د کشف او جرمونو پر وړاندې د مبارزې ریاست منسوبینو د ننګرهار ولایت په تورخم ښارګوټي کې څو کشفي عملیات ترسره کړي دي.
د وزارت په خبرپاڼه کې راغلي، په دغو عملیاتو کې د ګمرک د مؤظفینو او کمېشن کارانو په ګډون د مالي فساد او له سوداګریزو محمولو د باج اخیستنې په تړاو ۲۰ کسان نیول شوي دي.
سرچینه زیاتوي له یادو کسانو څخه یوه اندازه نغدې پیسې هم د پولیسو لاس ته ورغلي دي.
له دې وړاندې د تېرې پنجشنبې په ورځ د ننګرهار ولایت د تورخم ګمرک ۳۰ تنه کارکوونکي هم د فساد په تور نيول شوي وو.