تاند (دوشنبه د قوس ۳) د غزني سیمه ییز چارواکي وايي چې یوه کس د دغه ولایت په جاغوري ولسوالۍ کې خپله لور په ډزو وژلې ده.
د غزني د والي ویاند وحیدالله جمعه زاده وايي، دغه پېښه بېګا په جاغوري ولسوالۍ کې رامنځته شوې ده.
دده په خبره یاد کس د جاغوري ولسوالۍ اوسېدونکی دی.
د نوموړي په وینا، دغه کس لومړی خپله لور او بیا د ګاونډي ځوان زوی وژلي، چې اوسمهال قاتل له پولیسو سره دی.
د امنیه قومندانۍ مسؤلانو د نجلۍ د پلار له خولې ویلي، چې لور یې له یاد هلک سره ناروا اړیکه لرله او همدا لامل شو چې دواړه یې ووژل.
په افغانستان کې د ناموسي وژنو پېښې هر کال له ګڼ شمېر کورنیو قرباني اخلي.