تاند (چهارشنبه د عقرب ۲۸) ولسمشر محمد اشرف غني د پاکستان د صدراعظم له سلاکار عبدالرازق داودو او مل پلاوي سره په خبرو کې ویلي، چې افغان سوداګر د پاکستان په ګمرکونو او بندرونو کې له زیاتو ننګونو سره مخامخ دي.
دغه لیدنه چې تېره ورخ ماښام مهال شوې، پکې د سواداګرۍ او ترانزیټ د دواړه اړخیزه اړیکو پر پراختیا، اسانتیاو رامنځ ته کولو، د سیمه ییز اتصال، د افغانستان او پاکستان تر منځ د اپټا تړون، د کاسا زر، او ټاپې پروژو په اړه خبرې شوي.
د ارګ په خبرپاڼه کې د ولسمشر غني له قوله راغلي، افغان لوری د اقتصادي اړیکو د پراختیا نیت لري چې اساس یې کېږي، پراختیا ورکړي، ننګونې حل او د سیمه ییز اتصال پر سترې اجنډا تمرکز وکړي.
ښاغلی غنی وايي، که دغه ننګونې حل شي، موږ به د سوداګرۍ، ترانزیټ، اقتصاد او د دواړو هیوادونو د ولسونو د اړیکو په برخو کې د متقابلې همکارۍ زیات فرصتونه ولرو.
په ورته مهال افغان او پاکستاني چارواکو تېر ماښام د سوداګرۍ پراختيا په هدف د ګمرکي همکاريو زياتولو هوکړه لاسليک کړې ده.
ددې هوکړې له مخې به د اقتصادي او سوداګريزو همكاريو د پراختيا په هدف سوداګرو ته ګمرکي او په ځانګړې توګه د ټرانزيټي تجارت په برخه کې اسانتياوې رامنځته شي.
د افغانستان او پاکستان ترمنځ د ټرانزيټ او سوداګرۍ اوسنی تړون د ۲۰۲۱ميلادي کال په فبرورۍ کې پايته رسېږي.
دغه هوکړه لیک په داسې مهال لاسلیک کېږي چې ټاکل شوې نن د پاکستان صدراعظم عمران خان کابل ته راشي. له نوموړي سره به د دوه اړخيزه اقتصادي او سوداګريزو اړيکو پر پراختيا سربېره، د افغانستان سولې روانې پروسې په اړه خبرې وشي.