تاند (چهارشنبه د عقرب ۲۸) ولسمشر محمد اشرف غني د امریکا له نوي سرپرست دفاع وزیر کریستوفر مېلر سره تلېفوني خبرې کړي.
دواړو لوریو د سولې پر بهیر، دوه اړخیزه اړیکو او له افغان ځواکونو څخه د دوامداره ملاتړ په هکله د سه شنبې په ماښام خبرې کړي دي.
د ارګ له لوري په خپره شوې خبرپاڼه کې راغلي، چې د امریکا د دفاع سرپرست وزیر خپلو خبرو کې د افغان امنيتي او دفاعي ځواکونو د ملاتړ پر دوامداره کيفيت ټينګار کړی دی.
دغه ټیلفوني خبرې وروسته له هغه شوي چې کریستوفر میلر د سې شنبې په ورځ اعلان وکړ چې د امریکا متحد ایالتونه غواړي چې د جنورۍ تر ۱۵ پورې له افغانستان او عراق څخه ۲۵۰۰ سرتېري وباسي.
دده په خبره چې دا د ولسمشر ټرمپ امر دی او دوی یې تطبیقوي.
د امریکا د دفاع نوي سرپرست وزیر ویلي، چې د سرتېرو د ایستلو په اړه یې د کانګرس په ګډون له ځینې مشرانو، ناټو او افغان ولسمشر غني سره خبرې کړې دي.
کریستوفر مېلر له ولسمشر غني سره په خبرو کې ویلي، په افغانستان کې د سولې هڅې زیاتې شوي او امریکا به د افغان حکومت او دغه هېواد تر څنګ ولاړه وي.