تاند( شنبه، دعقرب ۲۴) د افغانستان د کرکټ ملي لوبډلې الرونډر لوبغاړی میرويس اشرف وايي د کندز د شېرخان بندر په لويه لاره غلو ترې هرڅه واخيستل او په خپله مخه لاړل.
هغه په خپله فېسبوک پاڼه لیکلي: « د کندز شیر خان بندر لویه لاره او د غلو بې ډاره لوټ ماري او بې ساری پرفامنس هغه هم د امنیتي پوستو په شتون کې، د ورځې ۳ بجې د پنجشنبې ورځ مورخ ۱۲ م د نومبر، موقعیت د دشت ابدان ګولای، ظالمانو غلو له ملګرو سره سم وایټ واش کړو.»
د نوموړي له دې ليکنې وروسته د هغه د پاڼې څارونکو په ټولنيزو شبکو کې پر امنيتي منسوبينو سختې نيوکې کړي.
دوی له مسولینو څخه د ورته کړنو په مخنیوي کې د کوټلو ګامونو اخېستو غوښتنه کړې.
د دې سربېره په کابل کې هم د وسله والو غلو او لاره شکوونکو په تړاو په دې وروستیو کې شکایتونه ډېر شوي دي.
په ټولنیزو رسنيو کې د کابل له غلو د شکایتونو په ډېریدو سره د ولسمشر لومړي مرستیال امرالله صالح د کابل د امنیت د ټينګولو مسؤلیت په خپله غاړه واخېست، خو ليدل کېږي چې هېڅ بدلون نه دی راغلی.