تاند (دوشنبه، دعقرب ۱۹) د افغانستان لپاره د ایران ځانګړي استازي ابراهیم طاهریان ویلي چې د افغانستان په چارو کې د ملګري ملتونو همکاري اړینه ده او دا سازمان دې د بین الافغاني مذاکراتو برخه کې لازمه همکاري وکړي.
طاهریان دا څرګندونې د افغانستان لپاره د ملګري ملتونو له ځانګړې استازې دبورا لاینز سره په لیدنه کې کړې دي.
ایراني رسنۍ وایي په دې لیدنه کې دواړو لوریو د افغانستان پر سیاسي او امنیتي وضعیت او دغه راز بین الافغاني مذاکراتو مفصلې خبرې کړې دي.
طاهریان ویلي چې، د بین الافغاني مذاکراتو پرمختګ د نړیوالې ټولنې له همکارۍ پرته ممکن نه دی نو د دوی په ګډون ټول هېوادونه باید په دې برخه کې مرسته وکړي.
دواړو لوریو دغه راز په تېرو درېیو میاشتو کې د تلفاتو پر لوړېدو اندېښنه څرګنده کړې او د تاوتریخوالي د کمښت غوښتنه یې کړې ده.