تاند (سه شنبه، د عقرب ۶) د فاریاب ولایت چارواکي وایي، چې طالبانو کشفي الوتکو ته لاسرسی پیدا کړی دی.
والي نقیب الله فایق زیاته کړې، دا الوتکې څو کېلومتره الوتنه کوي او د شپې له لوري انځور اخیستلو وړتيا هم لري.
فایق دغه راز ویلي چې داعش وسله وال او ډېر شمېر بهرني ترهګر د طالبانو ترڅنګ په دغه ولایت کې جګړه کوي او په خبره یې ازبکستاني وسله والو له دغو الوتکو څخه د خواجه سبزپوش او قیصار ولسوالیو په جګړه کې ګټه اخلي.
په ورته مهال څو ورځې وړاندې په غزني کې د هند نیمې وچې لپاره د القاعده ډلې مشر هم د افغان ځواکونو په عملیاتو کې ووژل شو.
د یادونې ده چې طالبانو له امریکا سره د دوحې هوکړه کې له بهرنیو ترهګرو سره د اړیکې پرې کولو ژمنه کړې ده خو افغان حکومت ادعا کوي چې طالبان اوس هم بهرنیو ترهګرو سره اړيکه پالي.