تاند (دوشبنه د عقرب ۵) ولسمشر اشرف غني وايي، په کابل کې پر کوثر ښوونیز مرکز د شوي برید عاملین او شبکې دې تشخیص او له منځه یووړل شي.
ولسمشر غني دغه څرګندونې نن د کابل د عمومي امنیتي وضعیت ارزونې او د کابل ښار په دیارلسمه امنيتي حوزه کې پر یاد مرکز د شوي برید په تړاو په شوې غونډه کې کړي دي.
د ارګ له لوري په خپره شوې خبرپاڼه کې راغلي، چې اشرف غني په دې پېښه کې د هر وژل شوي کس کورنۍ ته د سل زره او د هر تپي شوي کس کورنۍ ته د پنځوس زره افغانیو نغدي مرستې د ورکړې خبره کړې ده.
دغه راز ښاغلي غني د خپلو خبرو پر دوام ویلي، چې خلک له بېلابېلو ګواښونو سره مخامخ دي، نو امنیتي ځواکونه باید د هر حالت لپاره تیار اوسي.
د تېرې شنبې په ورځ د کابل په دشت برچي سیمه کې د کوثر ښوونېز مرکز ته څېرمه ځانمرګي برید ۲۴ کسان ووژل او ۵۷ نور یې ټپیان کړل.