تاند (دوشنبه د عقرب ۵) په پلازمېنه کابل او ولایاتو کې د ناامنیو له زیاتېدو سره سم د ولسي جرګې غړي د افغانستان او امریکا تر منځ د امنیتي تړون د لغوه کېدو غوښتنه کوي.
د جرګې غړیو په نننۍ غونډه کې وویل، امریکا ژمنه کړې وه چې د امنیتي تړون په لاسلیک کېدو سره به په افغانستان کې امنیت تامین او سوله به راشي، خو برعکس امنیتي وضعیت نور هم خراب شوی دی.
د وکیلانو په خبره، د امریکا او افغانستان تر منځ شوي امنیتي تړون د وضعیت د خرابېدو لامل شوی دی.
د دوی په وینا ددې پر ځای چې د افغانستان حکومت ملاتړ وکړي د دولت د مخالفانو ملاتړ کوي.
د ولسي جرګې غړي د امریکا او طالبانو تر منځ په دوحه کې شوي تړون ته په اشارې سره وايي، په افغانستان کې د روانې جګړې د شدت موکې امریکا برابره کړې ده او همدا هوکړه لامل شوې چې جګړه لا زور واخلي.
امریکا او طالبانو د ۱۳۹۸ کال د حوت میاشتې په ۱۰مه نېټه د سولې په اړه خپلمنځي هوکړه لاسلیک کړه. فکر کېده چې دا هوکړه به په افغانستان کې د روانې ۴۰ کلنې جګړې د پای لپاره یو مهم پیل وي، خو د څو میاشتو په تېرېدو سره ددې پر ځای چې امنیتي وضعیت ښه شي لا خراب شوی دی.
په دې وروستیو کې د کابل په ګډون په ډېرو ولایتونو کې جګړې زیاتې شوي دي چې هره ورځ پکې لسګونه کسانو ته مرګژوبله اوړي.
باور خو مې نشی خو وایو چې الله تعالی دی وکړی چې د ولسی جرګې غړی په دې پریکړه کې یوه خله او یو موټی شی ترڅو په امریکا فشار راوړی