تاند (شنبه د عقرب ۳) چارواکي وايي، غزني کې د سړک غاړې ماین چاودنې ۹ کسان وژلي دي.
د غزني د والي ویاند وحیدالله جمعه زاده وايي، نن د ورځې لس نیمې بجې د غزني ښار د دویمې امنیتي حوزې اړوند په روضې کوتل سیمه کې د ملکي وګړو پر موټر د سړک غاړې ځای پر ځای شوي ماین چاودنه کړې ده.
د نوموړي په وینا په دې پېښه کې د څلور ښځو او یو سرتېري په ګډون ۹ کسان وژل شوي او درې پولیس ټپیان دي.
تر اوسه کوم چا یا ډلې ددې پېښې مسؤلیت نه دی منلی، خو په دې وروستیو کې د نورو بریدونو سربېره د سړک غاړې ماین چاودنې زیاتې شوي چې د امنیتي ځواکونو سربېره پکې ګڼو ملکیانو ته مرګژوبله اوړي.
بلخوا د کورنیو چارو وزارت وايي، طالبانو په تېره یوه اونۍ کې ۳۵۶ بریدونه او ۵۲ د ماین چاودنې کړي، چې له امله یې ۵۱ ملکي وګړي وژل شوي او ۱۳۷ نور تپیان دي.
د وزارت د ویاند طارق آرین په خبره په دې موده کې د امنیتي ځواکونو په ځوابي حملو کې ۴۰۳ طالبان وژل شوي او ۱۴۰ نور ټپیان دي.
په ورته مهال د بښنې نړیوال سازمان وايي، چې روانه جګړه هره ورځ د افغانانو ژوند اخلي او تر بل هر وخت خونړۍ شوې ده.
دغه بنسټ روانه اکتوبر میاشت د افغانانو لپاره خورا خونړۍ میاشت بللې ده او پر نړیوالو غږ کوي چې د افغانستان وضعیت ته جدي پاملرنه وکړي.