تاند (چهارشنبه د میزان ۳۰) له شاوخوا ۸ میاشتو ځنډ وروسته، نن د افغانستان حکومت ولسي جرګې ته د باور رایو اخستلو په خاطر نوماند وزیران معرفي کوي.
ټاکل شوې ولسمشر محمد اشرف غني ولسي جرګې ته د ۲۶ نوماند وزیرانو او د دوو ادارو د رئیسانو د معرفي کولو په مراسمو کې وینا وکړي.
ولسمشر غني د ۱۳۹۸ کال د حوت میاشتې په ۲۰ نېټه د خپلې دویمې دورې د لوړې په مراسمو کې وویل، چې په دوو اونیو کې به ولسي جرګې ته ټوله کابینه معرفي کوي، خو بریالی نه شو.
له هغې ژمنې دا دی شاوخوا ۸ میاشتو وروسته حکومت په دې توانېږي چې نن خپله ټوله کابینه د رایې اخیستلو لپاره ولسي جرګې ته ور وپېژني.
په همدې حال کې د افغانستان د ازادو او عادلانه ټاکنو بنسټ (فیفا) وايي، مخکې له دې چې ولسي جرګه نوماند وزیرانو ته د رایو صندوق کېږدي، باید د دویم تابعیت د لغوه کېدلو په اړه یې ډاډ تر لاسه کړي.
ددغه بنسټ مسؤلان له ولسي جرګې غواړي چې د رایې ورکولو پروسه کې د فساد مخه ونیسي او د سلیقوي چلند پر ځای د تخصص له مخې نوماند وزیرانو ته رایه ورکول شي.
خو د ولسي جرګې غړي بیا همدې مسئلې ته په اشارې سره وايي، چې دوی به د هراړخیزې څېړنې وروسته نوماند وزیرانو ته د رایو صندوقونه کېږدي.
تر دې وړاندې د ولسي جرګې یو شمېر غړیو ویلي وو، چې دا ځل به د بل کوم تابعیت لرونکي نوماند ته رایه ورنکړي، خو که ولسي جرګه چې په وکیلانو یې تل د درغلۍ تورونه لګول کیږي، معاملو ته مخه کړي، ښایي چې بیا ستونزې د تېر په څېر پاتې شي.