تاند ( چهارشنبه، د میزان ۳۰) د پاکستاني رسنیو د راپورونو له مخې، د پاکستان په کراچۍ ښار کې په یوه استوګنیزه ودانۍ کې درنې چاودنې ۳۳ کسانو ته مرګ ژوبله اړولې ده.
پاکستاني رسنۍ د امنیتي چارواکو له قوله لیکي چې په دې پېښه کې ۵ تنه مړه شوي او ۲۸ نور ټپيان شوي دي.
چارواکو ویلي؛ چاودنه ډېره درنه وه او د یوې څلور پوړیزې ودانۍ دوه پوړه یې په بشپړه توګه له منځه وړي دي.
د هغوی په وینا، د ډېریو ټپیانو روغتیایي وضعیت نازک دی او ښایي د مرګ ژوبلې شمېره نوره هم لوړه شي.
پېښه د کراچۍ په ګلشن اقبال سیمه کې رامنځته شوې چې او تر اوسه یې علت هم روښانه نه دی.