تاند (سه شنبه د میزان ۲۹) ټاکل شوې د ازبکستان د لومړي وزیر مرستیال او د دغه هېواد د بهرنۍ سوداګرۍ او پانګونې وزیر کابل ته سفر وکړي.
د افغانستان د بهرنیو چارو وزارت له لوري په خپره شوې خبرپاڼه کې راغلي چې اوکتامویچ امور زاکوف او ورسره پلاوی به نن سه شنبې د میزان په ۲۹ مه کابل ته راشي.
د خبرپاڼې د معلوماتو له مخې د دواړو هېوادونو مشران به د دوه اړخیزه اړیکو او دغه راز د سوداګریزو او ترانزیټي چارو پر لا پیاوړتیا خبرې وکړي.
د وزارت معلومات ښيي، چې ازبک پلاوی به د افغان ولسمشر له لومړي مرستیال امرالله صالح، د بهرنیو چارو له سرپرست وزیر محمد حنیف اتمر، د ولسمشرۍ ماڼۍ د دفتر رئیس محمد شاکر کارګر، د کار، صنایع، ټول ګټو او ترانسپورت وزیرانو سره وګوري.
دغه راز ټاکل شوې یاد پلاوی د افغانستان د اوسپنې پټلۍ له عمومي رییس یما شمس او د برېښنا شرکت له مشرانو سره هم لیده کاته وکړي.
سرچینې زیاته کړې، چې د دغه لیدنو په ترڅ کې به د دواړو هېوادونو تر منځ پر سیاسي، اقتصادي، امنیتي، فرهنګي، سوداګریزه، ترانزیټي چارو او دغه راز د سیمه ییز پیوستون او ګډو بنسټیزه پروژو په اړه بحث او خبرې وشي.
د افغانستان د بهرنیو چارو وزارت وايي چې دغه ازبک پلاوی به د افغانستان د ټولنیزو چارو، کرنې او مالدارۍ وزراتونو او دغه راز د برېښنا شرکت سره ځینې تړونونه هم لاسلیک کړي.