تاند (چهارشنبه د میزان ۲۳) د کرنې اوبو لګولو او مالدارۍ وزرات وايي، چې سږ کال د دایکندي ولایت د مڼو باغونو ۳۵ زره ټنه حاصلات ورکړل.
ددې وزارت له لوري په خپره شوې خبرپاڼه کې راغلي، چې دایکندي کې د مڼو د ۲۱ سړو خونو کارونه په چټکۍ سره روان دي او ۷۰ سلنه یې بشپړ شوي دي.
دا خونې د کرنیزو محصولاتو د مدیریت په چوکاټ کې د ۴۹ میلیونه افغانیو په لګښت سره جوړېږي، چې لس سلنه لګښت یې د کروندګرو له خوا ورکول کېږي.
د کرنې وزارت د معلوماتو له مخې هره سړه خونه د شاوخوا ۲۵ مټریک ټنه مڼو د ذخیره کولو ظرفیت لري.
د بادامو تر څنګ مڼه هم د دایکندي له عمده مېوو څخه ده چې په پراخه کچه په دغه ولایت کې تولیدېږي.