تاند (دوشنبه، د میزان ۲۱) په کابل کې د پاکستان په سفارت کې د شته فساد او کمکارۍ پر وړاندې خلکو اعتراض کړی دی.
لسګونو لاریون کوونکو نن د دویم ځل لپاره د دغه سفارت مخې ته لاریون کړی او تور پورې کوي، چې په دغه سفارت کې پراخ فساد او کمکاري د کارونو د ځنډ لامل ده.
لاریون کوونکي وایي له څو ورځو راهیسې سفارت دوی د ویزو لپاره راغواړي خو وېزې نه ورکوي او کارونه یې ځنډوي.
دوی وایي: 《 له دوی سره ناروغان وي، له لرې سیمو سفارت ته راځي خو هېڅوک یې غږ نه اوري او د پاکستان د سفارت چارواکي هم ددوی د ستونزو پروا نه ساتي.》
تر دې وړاندې هم د دغه سفارت پر ضد لاریونونه شوي او په دغه سفارت کې یې د پراخ فساد د موجودیت خبره شوې ده.