تاند(دوشنبه، د میزان ۲۱) د کورنیو چارو وزارت ویاند طارق ارین د دوشنبې په ورځ خبري ناستې ته وویل، په تېره یوه میاشت کې د هېواد په بېلابېلو برخو کې ۱۴۵۵ جنایي پېښې شوې چې په تړاو یې ۲۱۸۱ تنه نیول شوي دي.

د نوموړي په وینا، یوازې په کابل ښار کې په تېرو ۲۰ ورځو کې ۱۴۶ جنایي جرمونه شوي، چې افغان سرتېرو د دغو پېښو په تړاو ۱۳۳ تنه جنایي مجرمین نیولي دي.

ارین زیاتوي چې ټولو نیول شوو مجرمینو په وژنو، وسله والو غلاوو، د عامه نظم په ګډوډولو او ورته نورو جنایي پېښو کې لاس درلود.

په ورته وخت کې ارین دا هم وویل چې د طالبانو له خوا یوه ۱۰۰ کسیزه ډله په کابل ښار کې د ترور لپاره ګمارل شوې ده، چې په وینا یې افغان ځواکونو د دې ډلې ۱۵ تنه نیولي دي.

امنیتي مسولین پر داسې مهال د یادو کسانو د نیولو خبر ورکوي چې تېره شپه نامعلومو وسله والو د کابل ښار د ۱۸ مې امنیتي حوزې په مربوطاتو کې یو تن ډاکتر وژلی او یو تن یې ټپي کړی دی.