تاند(سه شنبه، د میزان ۱۵) د لغمان د والي ویاند اسدالله دولتزي رسنیو ته وویل چې پرون سهار شااوخوا ۱۰بجې د مرکز مهترلام اړوند د سلطان غازي بابا ښارګوټي دخولي دروازې ته څېرمه د دغه ولایت د والي رحمت الله یارمل په موټریز کاروان موټربم چاودنه شوې.
دولتزی زیاتوي چې خپله والي ترې روغ وتلی خو د پېښې له ځایه د مهترلام ولایتي روغتون ته ۴۴ کسان انتقال شوي چې له ډلې یې ۸ کسان وژل شوي دي.
د دولتزي په خبره، په وژل شویو کسانو کې ۴ تنه د لغمان د والي ساتونکي او ۴ نور ولسي وګړي دي.
دولتزي وویل چې په ټپي شویو ۳۶ کسانو کې دوه د والي ساتونکي او پاتې نور ملکي کسان دي.
د لغمان پر والي رحمت الله یارمل دغه موټربم برید په داسې حال کې شوی چې نوموړی خپل دفتر ته د تګ په حال کې و.
د یادونې ده چې دوه ورځې وړاندې د ننګرهار د غني خېلو ولسوالۍ د مقام پر تعمیر هم موټربم چاودنه شوې وه چې له امله یې د ۴ ماشومانو او یوې مېرمنې په ګډون ۱۶ تنه وژل شوي وو او ۴۰ نور ټپیان وو.
تر اوسه د دغو دواړو بریدونو مسؤلیت چا نه دی منلی.