تاند(دوشنبه، د میزان ۱۴) د افغان پلاوي ځينو سرچینو رسنیو ته ویلي دي چې د طالبانو او افغان پلاوي ترمنځ اختلافات لا هم پر خپل ځای دي او تازه یو شمېر هېوادونو هڅې پيل کړې دي چې ددغه اختلافونو د ختمولو لپاره منځګړیتوب وکړي.
سرچینې د یادو هېوادونو نومونه نه دي اخیستي خو تازه د افغان سولې لپاره د امریکا د بهرنیو چارو وزارت ځانګړي استازي زلمي خلیلزاد، د افغانستان لپاره د اروپايي ټولنې استازي او د ناټو استازي له طالب پلاوي سره کتلي او له دوی سره یې پر بېلو مسایلو بحثونه کړي دي.
له دې سره جوخت قطر، جرمني، ناروې، ازبکستان او اندونیزیا هېوادونو د افغان سولې د ملاتړ په نامه ډله هم جوړه کړې او ژمنه یې کړې چې له افغان سولې سره به همکاري کوي.
د دغه هیوادونو د ملاتړ څرګندونې داسې مهال راپورته کیږي چې نن د افغانستان ولسمشر محمد اشرف غني هم په دوه ورځني سفر قطر ته ځي دا چې په کومو مسایلو غږیږي تر اوسه یې په اړه جزیات نشته.