تاند (شنبه د میزان ۱۲) د ننګرهار ولایتي چارواکي وايي نن غرمه ۱۲:۲۰ دقیقې ددغه ولایت د غني خېلو ولسوالۍ ودانۍ ته څېرمه موټربم چاودنې د یوه سرتېري په ګډون ۱۴ ملکي وګړي وژلي دي.
د ننګرهار د والي ویاند عطا الله خوګیاڼي وايي، تر برید وروسته څو تنو وسله والو غوښتل چې په سیمه کې ځانونه ځای پرځای کړي او له امنیتي ځواکونو سره جګړه وکړي، خو په وینا ټول بریدګر له منځه وړل شوي دي.
د نوموړي د معلوماتو له مخې په دې پېښه کې د یوې ښځې او څلور ماشومانو په ګډون ۱۳ ملکي وګړي او یو امنیتي سرتېری وژل شوي دي او د څلورو امنیتي منسوبینو په ګډون ۴۲ ملکي وګړي ټپیان شوي دي.
بلخوا د افغانستان ملي راډېو تلویزیون خبر ورکړی چې په دې برید کې د افغانستان د کرکټ د لوبڅار بسم الله جان شینواري د کورنۍ ۷ غړي وژل شوي دي، خو د والي ویاند بیا ویلي چې د وژل شویو کسانو هویت لا نه دی روښانه شوی.
تر اوسه کوم چا یا ډلې ددې چاودنې مسؤلیت نه دی منلی.
الله ج ددی خاوری اووطن دښمنان تل ذلیله ،تباه اوبرباد ولری