تاند (پنجشنبه، د سنبلې ۱۰) د افغانستان د سولې لپاره د امریکا ځانګړی استازی زلمی خلیلزاد نن په دوحه کې وو چې د افغانستان د دولت او طالبانو د سولې د خبرو له چټکتیا سره مرسته وکړي.
که څه هم په دوحه کې د حکومت او طالبانو د مرکچي پلاوو غړي ټینګار کوي چې د دوی په خبرو کې هیڅ بهرنی نشته او نه پکې رول لري خو لوېدیځې رسنۍ وايي چې خلیلزاد وروسته له دې له واشنګټن څخه د دوحې په لور وخوځېد چې د حکومت او طالبانو ترمنځ د سولې په خبرو کې خنډ پېښ شو.
ځینې باوري سرچینې وايي چې خنډ وروسته له دې لېرې شوی چې د ملي مصالحې د عالي شورا رييس عبدالله عبدالله اسلام اباد ته لاړ او د پاکستان ملاتړ یې د دې خنډ د لېرې کولو په برخه کې ترلاسه کړ.
د لوېدیځو رسنیو د راپورونو له مخې، خلیلزاد نن د دولت او طالبانو له پلاوو سره کتلي او دواړه خواوې یې هڅولي چې د سولې د رسمي خبرو پړاو پیل کړي.
د تېر سپټمبر په نیمايي کې د دوو خواوو د تماس ډلو د رسمي خبرو د اجنډا او تګلارې لپاره خبرې پیل کړې خو تراوسه پورې پرې سلا شوي نه دي.