تاند(پنج شنبه، د میزان ۱۰) د کندهار-هرات پر لویه لار د یوې ترافیکي پېښې له امله یوولس تنه مړه شوي دي.
دا پېښه د هرات ولایت په ادرسکن ولسوالۍ کې شوې ده.
د هرات د والي ویاند غلام جیلاني فرهاد وایي چې پېښه د مسافر وړونکي ۴۰۴ ډوله او یوه فلانکوچ موټر د ټکر له امله رامنځ ته شوې ده.
فرهاد وايي، په پېښه کې یوولس تنه مړه شوي شوي او شپږ نور ژوبل دي.
نوموړی د پېښې لامل د موټر چلوونکو بې احتیاطي په ګوته کوي.
د کندهار-هرات لویه لار ډېر وخت د موټر چلوونکو د بې احتیاطۍ له امله ددغه ډول بوږنوونکو پېښو شاهدې وي چې ګڼو افغانانو ته یې له امله مرګ ژوبله اوړي.