تاند ( دوشنبه، د میزان ۷) د وروستیو راپورونو له مخې اذربایجان تر دې دمه له ارمنستان څخه اووه کلي نیولي دي.
اذربایجاني حکومت ویلي، دوی پیاوړي دي او ژر تر ژره به په ډېرو سیمو کې د ارمنستان نفوذ ختم کړي.
بل لورته ترکیې ویلي چې، په دې مسئله کې د اذربایجان تر څنګ ولاړ دی خو ایران بیا ویلي چې، د دواړو لورو ترمنځ یې د منځګړیتوب هڅه پیل کړې څو دغه ناندرۍ پای ته ورسېږي.
دواړو لورو تر اوسه د مرګ ژوبلې په اړه دقیق معلومات نه دي خپاره کړي، خو وایي ملکي وګړو ته پکې درنه مرګ ژوبله اوښتې ده.
تېره ورځ د اذربایجان دوې چورلکې او درې بې پيلوټه الوتکه غورځول شوې وې.
د یادونې وړ ده چې دوې میاشتې وړاندې هم په سرحدي سیمه قرهباغ کې د دواړو هېوادونو د ځواکونو ترمنځ نښته شوې وه چې، له کبله یې ۱۶ کسان وژل شوي وو.