تاند (شنبه د میزان ۵) روسیې یو ځل بیا په سوریه کې د امریکا حضور غیر قانوني او د نفتو د غلا په مانا بللی دی.
د روسیې د بهرنیو چارو وزارت مرستیال سرګي وشینین ویلي، دوی تر دې وړاندې هم ویلي وو او اوس یې ټینګار کوي چې په سوریه کې د امریکا حضور غیر قانوني دی.
سرګي وشینین په خپلو خبرو کې ویلي، چې په سوریه کې امریکا حضور نه یواځې یو غیر قانوني عمل دی، بلکې د یاد هېواد د طبیعي زېرمو په ځانګړې توګه د نفتو د غلا په مانا دی.
د نوموړي په وینا د سوریې تر ټولو غني سیمه التنف دی چې هلته د امریکا حضور د منلو وړ خبره نه ده.
هغه د خپلو خبرو پر دوام ویلي، دوی له بېلو ډیپلوماټیکو لارو له امریکا سره په دې برخه کې د اختلافاتو د حل هڅه کړې ده خو تر اوسه کومې مثبتې پایلې ته نه دي رسېدلي.
سرګي وشینین څرګنده کړې، د دمشق له توافق پرته په سوریه کې هر ډول نظامي حضور د امنیت شورا د ۲۲۵۴ قطعنامې او نړیوالو قوانینو ښکاره نقض دی.