تاند(شنبه، د میزان ۵) خلیلزاد وایي ژر به هڅې پيل کړي چې په افغانستان کې دواړه خواوې اوربند او د تاوتریخوالي کمولو ته وهڅوي.
د افغان سولې لپاره د امریکا د بهرنیو چارو وزارت ځانګړي استازي زلمي خلیلزاد په خپله تازه مرکه کې ویلي په افغانستان کې اوسنی روان تاوتریخوالی د جدي اندېښنې وړ دی.
دده په خبره تازه به رسمي هڅې پیل کړي چې طالبان او افغان حکومت د تاوتریخوالي کمولو ته وهڅوي.
هغه یو ځل بیا ویلي چې د افغان جګړې د پای لپاره ښکاره نېټه نه شي ټاکلی خو پوره هڅه یې روانه کړې چې روانه جګړه له ټولو ممکنه لارو په افغانستان کې پای ته ورسېږي.
خلیلزاد وایي د سولې راتګ او اوربند د افغانانو تر ټولو مهمه غوښتنه ده او ښکېلو لورو ته په کار ده چې د خپلو خلکو دې غوښتنې ته درناوی وکړي.
خلیلزاد داسې مهال دا څرګندونې کوي چې د افغانستان اوسنی وضعیت ورځ تر بلې ترینګلی کیږي.