تاند (جمعه د میزان ۴) ولسمشرغني د پاکستان له لومړي وزیرعمران خان سره د سولې په تړاو ټلیفوني خبرې وکړې.
له ارګ څخه په خپره شوې خبرپاڼه کې راغلي، چې ولسمشر محمد اشرف غني او د پاکستان لومړي وزیر عمران خان نن د دواړو هيوادونو د اړيکو، سولې پروسې او په افغانستان کې د اوربند ټينګښت په اړه ټلیفوني خبرې کړي دي.
په خبرپاڼه کې ویل شوي، ښاغلي غني له عمران خان سره په خبرو کې په افغانستان کې د اوربند په ټینګښت ټینګار کړی او عمران خان ته یې کابل ته د رسمي سفر بلنه ورکړې ده.
عمران خان هم د سفر بلنه منلې او ویلي یې دي چې په نږدې راتلونکي کې به کابل ته سفر وکړي او په افغانستان کې یې د اوربند د ټینګېدو بشپړ ملاتړ کړی دی.
دا خبرې په داسې مهال شوي چې په دوحه کې اوس هم بین الافغاني مذاکرات دوام لري او حکومت د اوربند په کولو او د تاوتریخوالي په کمولو ټینګار کوي.
ولسمشر محمد اشرف غني او عمران خان په داسې مهال دا ټلیفوني خبرې کړي چې ټاکل شوې د ملي روغې جوړې عالي شورا رئیس عبدالله عبدالله د راتلونکي دوشنبې په ورځ اسلام اباد ته سفر وکړي او هلته له پاکستاني چارواکو سره د افغان سولې په تړاو خبرې وکړي.