تاند (جمعه د میزان ۴) ایراني چارواکو زرنج او هرات ښارونو ته د برېښنا د لېږد او هلته د بادي برېښنا د تولید ژمنه کړې ده.
د افغانستان د بهرنیو چارو وزارت په خبرپاڼه کې راغلي، چې دا ژمنه کابل ته له ایران څخه راغلي فني او تخنیکي پلاوي ورسره کړې ده.
یاد پلاوي چې مشري یې د ایران د انرژۍ وزارت مرستیال همایون حایري کوله د افغانستان د بهرنیو چارو له سرپرست وزیر محمد حنیف اتمر سره په لیدنه کې ویلي، د سوداګرۍ، ټرانزیټ، او برېښنا په برخو کې به له افغانستان سره خپلې همکارۍ زیاتې کړي.
په دې لیدنه کې محمد حنیف اتمر هم په خپلو خبرو کې ویلي، افغانستان د سیمې او نړۍ له هیوادونو سره د اقتصادي او سوداګریزو همکاریو پراختیا او پیاوړتیا ته ژمن دی.
دغه راز ایران او افغانستان په خپلو کې د هر اړخیزو همکاریو یو سند هم لاسلیکوي چې د طرحې په بشپړېدو یې عملاً کار روان دی.
د سند د لاسلیک کېدو خبره وروسته تر هغه مطرح شوه، چې څه موده وړاندې په ایران کې له افغان کډوالو سره د تاوتریخوالي پېښې زیاتې شوې.
دواړو هېوادونو ښه وګڼله چې د ورته پېښو د مخنیوي لپاره یو سند لاسلیک کړي څو د کډوالو حقونه خوندي او د تاوتریخوالي ورته پېښې تکرار نه شي.