تاند (پنجشنبه د میزان ۳) عبدالله عبدالله په کابل کې د امریکا له شارژدافیر راس ویلسن سره خبرې وکړې.
د ملي روغې جوړې عالي شورا رئیس عبدالله عبدالله له راس ویلسن سره په لیدنه کې افغانستان کې د روان تاوتریخوالي په زیاتېدو سره اندېښنه څرګنده کړې ده.
په دې لیدنه کې په قطر کې د بین الافغاني مذاکراتو او د هېواد په سیاسي او امنیتي وضعیت خبرې شوي دي.
عبدالله په دې لیدنه کې ویلي چې په دوه کې د سولې روان خبرو پر مهال د تاوتریخوالي کمښت بحث اړین دی او په خبره یې د باور فضا رامنتځته کولو لپاره باید روان تاوتریخوالی کم شي.
په همدې حال کې پخواني ولسمشر حامد کرزي هم په کابل کې د امریکا له شارژدافیر راس ویلسون سره لیدلي دي.
د حامد کرزي له مطبوعاتي دفتر څخه په خپره شوې خبرپاڼه کې ویل شوي، چې په دې لیدنه کې د سولې پروسې برخه کې د وروستیو پرمختګونو او ځیني نورو موضوعاتو په اړه تفصیلي خبرې شوي دي.
دا لیدنې په داسې مهال شوي چې د طالبانو او حکومت د سولې مذاکراتي ټیمونو د تماس ډلو تر منځ اوس هم خبرې روانې دي، خو کومې مشخصې پایې ته نه دي رسېدلي.