د امریکا د فضايي تحقیقاتو ادارې، ناسا اعلان وکړ چې امریکايي ستورمزلي یا فضانوردان به تر ۲۰۲۴ م کال پورې بیا سپوږمۍ ته لاړ شي.
د دې پلان د عملي کېدو لپاره د شاوخوا ۲۸ ملیارد ډالره لګښت اټکل شوی چې د هغو له منځه به ۱۶ ملیارد ډالر د سفینې یا ستوربیړۍ پر جوړېدو ولګېږي.
خو د دې پروژې لپاره بودجه باید د امریکا کانګریس تصویب کړي او له دې کبله چې د امریکا د ولسمشرۍ د انتخاباتو موده په رانژدې کېدو ده، ښايي کانګریس په دې اړه پرېکړه وځنډوي. خو په هر صورت، دا پیسې باید له ۲۰۲۱ څخه تر ۲۰۲۵ پورې د امریکا په مالي بودجو کې شاملې شي.
د امریکا ولسمشر دونالډ ټرمپ د دې پلان تطبیق یو لومړیتوب بللی دی.
د ناسا سرپرست جیم برایډنسټاین د دوشنبې په ورځ په یوه انلاین خبري غونډه کې وویل«سیاسي مسلې په ځانګړي ډول د سږ کال په شان د حساسو انتخاباتو په درشل کې د ناسا د فعالیتونو په وړاندې لوی خنډونه دي.»
سره له دې چې د امریکا مخکنیو ولسمشرانو دې پلان ته ملیاردونه ډالر ځانګړي کړي وو خو بارک اوباما د خپلې ولسمشرۍ په دوره کې سپوږمۍ ته د ستورمزلو د لېږلو پروګرام لغوه کړ.
جیم برایډن سټاین وايي«که کانګریس تر کرسمیس وړاندې د دې پیسو لومړۍ برخه ۳ ملیارده او ۲۰۰ ملیون ډالره تصویب کړي لا به هم په دې بریالي شي چې تر ۲۰۲۴ م کال پورې پر سپوږمۍ د انسان د کښته کولو پلان عملي کړي.»
ده دا اوازې رد کړې چې ګنې ناسا غواړي چې بیا هم د سپوږمۍ استوايي کرښې ته انسان ولېږي. له ۱۹۶۹ تر ۱۹۷۲ پورې اپولو د سپوږمۍ په دې برخه کې کښته شوې وه.
د ناسا سرپرست وايي چې د نوي ماموریت هدف د سپوږمۍ جنوبي قطب دی.
د سپوږمۍ لپاره د سفینې د جوړولو لپاره دوې طرحې په پام کې دي. ټاکل شوې ده چې دوه ستورمزلي، چې یوه به یې ښځه وي، په اوریون ستورمزلي کې سپوږمۍ ته یووړل شي.
د ستوربیړۍ یا سفینې لومړۍ طرحه د امازون د ريیس او اصلي ونډه وال جیف بیزوس د نوې کمپنۍ بلواوریجن محصول ده. بله طرحه د ایلن ماسک د سپېس ایکس او یوه بل امریکايي شرکت داینټیکس ده چې کار پرې روان دی.
په پام کې ده چې لومړی د ۲۰۲۱ په نوومبر کې د ارتیمز په نوم د سپوږمۍ بې سپرلیو سفینه روانه شي. په دوهمه هڅه کې به همدا سفینه دوه ستورمزلي د سپوږمۍ مدار ته ورسوي او په درېمه هڅه کې به ارتیمیز سفینه د یوې اوونۍ لپاره په سپوږمۍ کې پاتې شي. دا به له ځان سره څو نورې سفینې هم یوسي.