تاند( سه شنبه، د میزان ۱) ولسشمر غني نن په ارګ کې د افغانستان لپاره د چین له ځانګړي استازي لیو جیان سره لیدلي دي.
ارګ په یوه خبرپاڼه کې ویلي، چې ولسمشرغني په دې لیدنه کې د افغان سولې پروسه کې د چین رول ته په اشارې ویلي، طالبان باید له تاوتریخوالي لاس واخلي او اوربند ته غاړه کېږدي.
خبرپاڼه زیاتوي، چې طالبان باید دا ومني چې له نظامي لارې د ستونزې حل ته نه رسېږي.
ولسمشر غني د خپلو خبرو پر دوام د افغانستان او چین ترمنځ د دوه اړخیزو اړیکو پر پیاوړتیا د ټینګار ترڅنګ زیاته کړې، چې د تلپاتې سولې لپاره د سیمه ییزې اجماع پیاوړتیا هم اړینه ده.
دغه راز په دې لیدنه کې لیوجیان وویل، افغانستان ته یې د سفر موخه د وروستیو تحولاتو په اړه د افغان دولت د نظر اورېدل دي او دغه راز يې د سولې روانوخبرو ته په اشارې زیاته کړه، چې افغان سوله حساس پړاو ته رسېدلې او چین په دې برخه کې د افغانستان له اقداماتو ملاتړ کوي.
هغه ویلي، هېواد یې د افغان سولې، انکشاف او د سیمه ییزو همکاریو تګلارې ملاتړکوي او هیله لري چې ټول اړخونه له دغه فرصت څخه سالمه ګټه پورته کړي.