تاند، چهارشنبه د سنبلې ۲۶مه: د کندهار چارواکي وایي د دغه ولایت د ۱۱ حوزې په ساحه کې به د هغه موندل شوي ښځي د جسد په اړه جدي پلټنې وکړي چې په ډیرې بې رحمۍ سره وژل شوې ده.
نن سهار د کندهار ښار د ۱۱ حوزې پولیسو ددې حوزې اړوند عینو مینه کې د یوې مېرمنې جسد موندلی دی.
د کندهار ولایتي چارواکي وايي دغه ښځه د هر ډول انساني کراماتو خلاف په ډېرې بې رحمۍ سره وژل شوې ده.
د کندهار د والي ویاند وايي، والي حیات الله حیات امنیتي مسؤلینو ته د پېښې د جدي پلټنو امر کړی تر څو د پېښې عاملین ونیول شي او قانوني مجازات شي.
د یاد ولایت د امنیه قومندانۍ ویاند جمال ناصر بارکزی بیا وايي تر اوسه ددې ښځې د هویت په اړه هېڅ معلومات نه شته او د پېښې انګېزه هم نه ده معلومه شوې.
ښاغلي بارکزي هم د پېښې په اړه د پلټنو پیلېدل تایید کړي او ویلي یې دي چې په دې اړه به وروسته له رسنیو سره معلومات شرک کړي.
بلخوا د ټولنیزو شبکو لسګونو کاروونکو دغه پېښه غندلې ده.