تاند، چهارشنبه د سنبلې ۲۶مه: د پکتیا والي حلیم فدایي وايي طالبان د تاوتریخوالي په زیاتولو او د لویو لارو په بندولو سره د سولې روان بهیر د خرابو هڅې کوي.
ښاغلي فدایي چې نن یې په پکتیا کې یوې لویې غونډې ته خبرې کولې وویل، طالبان په لویو لارو کې د “پاټکونو” په جوړلو سره د سولې رامنځته شوي فرصت نه ناوړه ګټه اخلي.
په یاده غونډه کې د ۲۰۳ تندر قول اردو مرستیال ګدا محمد دوست په خپلو خبرو کې وویل، قطر کې د بین الافغاني مذاکراتو پیلېدو سره د طالبانو په لیکو کې د بهیرنیو جنګیالیو په شمېر کې زیاتوالی راغلی دی.
د نوموړي په خبره د دوی پر وړاندې نه یواځې افغان طالبانو بلکې د بهرنیو هېوادونو څخه راغلو طالبانو هم جګړه کړې ده.
بلخوا د پکتیا اوسېدونکي په دغه ولایت کې د هدفي وژنو له زیاتېدو شکایت کوي او وايي چې د ورځې په تېرېدو سره د هدفي وژنو پېښې زیاتېږي چې دوی یې سخت اندېښمن کړي دي.
د دوی په وینا طالبانو د مرکز ګردېز او ۶ ولسوالیو لارې تړلي چې خلک له ستونزو سره لاس او ګرېوان دي.
د یادونې وړ ده چې له تېرو پینځو ورځو راپدېخوا د قطر په پلازمېنه دوحه کې د حکومت او طالبانو تر منځ د سولې مخامخ خبرې پیل شوي دي، چې هم مهال ورسره په هېواد کې جګړې زور اخیستی او هره ورځ پکې د جګړې د ښکیلو خواوو سربېره ولسي وګړو ته هم مرګژوبله اوړي.