تاند(چهارشنبه، د سنبلې ۲۶) د بلخ ولایت په چهارکنت ولسوالۍ کې په دوو کلیو طالبانو بریدونه ترسره کړي دي.
د یاد ولایت د ولایتي شورا مرستیال سید عبدالله مسرور رسنیو ته وویل، تېره شپه وسله والو طالبانو له دوو خواوو په چهارکنت ولسوالۍ کې د ملکي وګړو او پاڅون کوونکو پر کورونو برید وکړ.
دی زیاتوي، په دې پېښه کې د ښځو او ماشومانو په ګډون نهه تنه وژل شوي او درې نور ټپیان شوي دي.
دا په وروستۍ اونۍ کې دویم ځل دی چې طالبان په دې ولسوالۍ کې پر ملکي وګړو او پاڅونوالو برید کوي او د امنیتي سرتیرو تر څنګ ملکي وګړو ته هم پکې مرګ ژوبله اړوي.
تر اوسه طالبانو په دې اړه غبرګون نه دی ښودلی.