تاند، یکشنبه د سنبلې ۲۳مه: په قطر کې د طالبانو د سیاسي دفتر رئیس ملاعبدالغني برادر او د مذاکراتي ټیم مشر عبدالحکیم حقاني د کوربه هېواد له امیر سره ولیدل.
د طالبانو د سیاسي دفتر ویاند ډاکتر نعیم وردک پر خپل ټوېټر لیکلي، په دې لیدنه کې دواړو لوریو د سولې پر روانې پروسې خبرې کړي دي.
دواړو خواوو نن تر غرمې مخکې لیدلي دي.
ښاغلي وردک زیاته کړې د قطر امير د مذاکراتو په اړه د طالبانو له هڅو ستاينه کړې او په راتلونکي کې يې په دې برخه کې د همکاریو ډاډ ورکړی دی.
نوموړی وايي، ملا برادر هم د قطر هېواد له همکاریو مننه کړې او ډاډ یې ورکړی چې دوی به د سولې په برخه کې خپلې هڅې جاري وساتي.
دا په داسې حال کې ده چې پرون شنبه د قطر په پلازمېنه دوحه کې د حکومت او طالبانو تر منځ د سولې مخامخ خبرې پیل شوي، چې نن هم دوام لري.
په ورته مهال په قطر کې د ملي روغې جوړې عالي شورا رئیس عبدالله عبدالله په یوه خبري کنفرانس کې خبریالانو ته وویل، تر اوسه یې د طالبانو د مذاکراتي ټیم له مشر سره خبرې نه دي شوي.
د طالبانو ویاند هم تائیدوي چې تر اوسه د دواړو خواوو د تخنیکي ګروپونو تر منځ لیده کاته نه دي شوي، خو زیاتوي چې کله دواړه لوري سره کیني د مذاکراتي ټيمونو د ناستې لپاره به زمینه برابره کړي.