تاند(پنجشنبه، د سنبلې ۲۰) وروسته له دې چې په کابل کې د افغانستان د مرکچي پلاوي غړیو وویل چې سبا (جمعه) قطر ته روانیږي او د شنبې په ورځ له طالبانو سره خبرې پیلوي، طالبانو هم اعلان وکړ چې د سولې په غونډه کې ګډون ته تیار دي.
طالبانو نن شپه په یوه لنډه خبرپاڼه کې ویلي چې دوی له امریکا سره د کړې موافقې پر اساس د بین الافغاني مذاکراتو په افتتاحیه غونډه کې خپل ګډون ته چمتووالی اعلانوي.
د طالبانو د قطر د دفتر له لوري په دې خبرپاڼه کې دغه راز ویل شوي چې د سنبلې په ۲۲/ د سپټمبر ۱۲ به په قطر کې بین الافغاني خبرې پیل شي.
طالبانو همداراز ویلي «اسلامي امارت د مذاکراتو بهیر په ښه ډول پرمخ بیولو او د اسلامي ارزښتونو او هیواد د علیا منافعو په چوکاټ کې، د سرتاسري سولې او سوچه اسلامي نظام د رامنځ ته کیدو هوډ لري.»
تر دې مخکې نن د افغانستان د حکومت سرچینو او دغه راز د حکومت له لوري له طالبانو سره خبرو ته د ګومارل شوي پلاوي غړیو تایید کړه چې سبا ماسپښین به قطر ته روان شي او د شنبې په ورځ (د سپټمبر ۱۲) به د سولې خبرې پیل کړي.
د افغانستان د ملي امنیت شورا وايي چې د طالبانو ټول بندیان خوشي شوي او ۶ لانجمن بندیان یې نن په یوه الوتکه کې قطر ته واستول شول چې هلته نظر بند وي.
سوله الهي نعمت دی څوک چې په دغه لار کې کوښښ کوي اتل دی او څوک چې د سولې پروسه ناکامول غواړي د افغان ملت او د لوی افغانستان تر ټولو سخت دښمن دی.
رب دې سوله دايمي کړي رب دې ګران وطن کې امن او ورورګلوي قايمه کړي، آمين