تاند ( سه شنبه، د سنبلې ۱۸) د امریکا په کلیفورنیا ایالت کې له اونیو راهیسې لګېدلی اور لاهم نه دی کابو شوی او دوام لري.
اورد یاد ایالت په ځنګلي سیمو کې د پټاکیو دکارونې له امله رامنځته شوی دی.
کلیفورنیا ایالت د امریکا یو له هغو سیمو څخه ده، چې هرکال پکې پراخې اورلګېدنې رامنځ ته کېږي، خو د امریکا حکومت یې په مخنیوي نه بریالی کېږي.
د معلوماتو له مخې دغه ایالت د خپل تاریخ تر ټولو ګرم اوړی تېروي او ډېری اورلګېدنې هم د هوا د ګرموالي له امله رامنځ ته کېږي.
خو د ځایي چارواکو د معلوماتو پر اساس وروستۍ اورلګېدنه په یوه پروګرام کې د پټاکیو د کارونې له امله رامنځ ته شوې، چې نږدې ۷ زره جریبه ځنګل یې تر دې دمه له منځه وړی دی.
دغه راز ویل کېږي، چې دې اورلګېدنې تر دې دمه ۷۳ زره جریبه ساحه سوځولې ده.
بل لورته د هوا پېژندنې ادارې په یاد ایالت کې د هوا د ګرموالي له امله د نورو اورلګېدنو د رامنځ ته کېدو احتمالي خبرداری هم ورکړی دی.