تاند ( شنبه، د سنبلې ۱۵) د انګلستان او اسټراليا ترمنځ په لومړۍ نړيواله شل اوريزه لوبه کې انګلستان د ٢ منډو په توپير بريا خپله کړه.
دا لوبه تېره شپه په ساوتهمپټن کې ترسره شوه.
په دې لوبه کې اسټرالیا د لوبې پچه وګټله او لومړی یې توپ اچونه ترسره کړه.
انګلستان په ټاکلو شلو اورونو کې اسټرالیایۍ لوبډلې ته د ۷ لوبغاړو په سوځېدو د ۱۶۲ منډو هدف کېښوده، چې ډيويډ ملن په کې ترټولو ډېرې ٦٦ منډې جوړې کړې.
ورپسې د آسټرالیا لوبډله د هدف په ترلاسه کولو بریالۍ نه شوه او د ۶ لوبغاړو په سوځېدو یې یواځې ۱۶۰ منډې جوړې کړې او لوبه یې بایلوده.
د اسټراليا له لوري ډيويډ وارنر تر ټولو ډېرې ٥٨ او لوبډلمشر ارون فنچ ٤٦ جوړې کړې
د دواړو لوبډلو ترمنځ د ٣ نړيوالو شل اوريزو لوبو لوبلړۍ یو د صفر په مقابل کې د انګلستان په ګټه روانه ده.
د دې لوبلړۍ دويمه نړيواله شل اوريزه لوبه به په ساوتهمپټن کې د سپتمبر په ٦مه نېټه ماښام ٥:٤٥ بجې ترسره شي.