تاند، پنجشنبه د سنبلې ۱۳مه: متحده ایالاتو د جرمونو د نړیوالې محکمې پر یو شمېر غړیو تازه بندیزونه لګولي دي.
د امریکا د بهرنیو چارو وزیر مایک پمپیو وايي چې دغه بندیزونه د نړیوالې محکمې پر څارنوالې او ځینو نورو غړیو وضع شوي دي.
د نوموړي په خبره یاد بندیزونه ځکه وضع شوي چې دې محکمې غوښتل په افغانستان کې د امریکا پر کړنو څېړنې وکړي، چې دا د امریکا له داخلي قوانینو سره په ټکر کې عمل دی.
دجرمونو نړیوالې محکمې ځکه د امریکا غبرګون راپارولی چې غوښتل یې په افغانستان کې د طالبانو، امریکايي ځواکونو او افغان پوځيانو د جنګي جنایتونو په اړه پلټنې وکړي.
اوس امریکا ویلي هغه کسان او ادارې چې د نړیوالې محکمې له څارنوالې فاتو بنسودا سره په دې برخه کې همکاري وکړي له بندیزونه سره به مخ او په تور لېست کې به شامل شي.
ویل کېږي په دې بندیزونو کې د سفرونو محدودیت او د شتمنیو کنګلول هم شامل دي.