تاند، دوشنبه د سنبلې ۱۰: ایران وايي له افغانستان سره یې پر پوله او سوداګریزو بندرونو کې فعالیتونه زیات کړي دي.
د ایران د ګمرکاتو چارواکي وایي په دې وروستیو کې د ازبکستان، ایران او افغانستان د ګډ دهلېز په فعالیدو سره د افغانستان او ایران تر منځ په بندري سیمو کې سوداګریز فعالیتونه ډېر شوي دي.
د چارواکو په وینا ایراني لوری هڅه کوي چې دغه فعالیتونه نور هم پراخ کړي.
د ایراني چارواکو په وینا دوی له افغانستان سره خپل بندرونه لا فعالوي او هڅه کوي د سیمې نور هېوادونه هم په دغه دهلېز کې راګډ کړي.
د دوی په خبره د ایران او هند تر منځ سودا ګري، بیا ایران د افغانستان او مرکزي اسیا هېوادونو ترمنځ سوداګري او ترانزیت پراخوي.
باید وویل شي چې په دې ورستیو کې ایران د افغانستان له لارې د مرکزي اسیا هېوادونو سره د سوداګرۍ په برخه کې د پام وړ پرمختګ راغلی دی، چې چارواکي یې د افغانستان او سیمې لپاره ګټور اقدام بولي.