تاند (شنبه، د سنبلې ۸) په هرات کې د مهاجرو د بیا راستنېدلو چارو ریاست مسولان وایي، چې په تېرو دریو میاشتو کې تر ۲۲ زره زیات افغان مهاجر له ایران څخه په زوره ویستل شوي دي.
د دغه ریاست د مسولانو په خبره اوس هم هره ورځ شا او خوا ۵۰۰ مهاجر له ایران ویستل کیږي، چې پکې ښځې، بې سرپرسته ماشومان او ځوانان شامل دي.
له ایران څخه د افغان مهاجرو د ویستلو لړۍ په داسې وخت کې جریان لري، چې دواړه هېوادونه له کورونا وبا سره لاس او ګریوان دي او د اخراجېدونکو کسانو شمېر لا زیات شوی دی.
تر دې وړاندې د افغان مهاجرو پر وړاندې د ایران د پولیسو له خوا د تاوتریخوالي ډک چلن راپورونه ورکړل شوي وو، چې په ځینو مواردو کې د ایران امنیتي ځواکونه د افغان مهاجرو په اوبو کې د غرقولو او د هغوی د لېږدونکي موټر پر سوځولو تورن شوي وو.
خو د ایران له لوري تل دغه ډول تورونه رد شوي دي.