تاند، شنبه د سنبلې ۸: د ملي دفاع وزارت وايي په فاریاب او نیمروز ولایتونو کې یې ۲۴ طالبان وژلي دي.
د ملي دفاع وزرات څخه په خپره شوې خبرپاڼه کې راغلي، چې طالبان تېره ورځ د فاریاب ولایت د قرغان ولسوالۍ په ییلینګه او د اندخوی ولسوالۍ په غجر آباد کليو کې راټول شوي وو څو د امنیتي ځواکونو پر پوستو بریدونه وکړي.
سرچینه وايي، هوايي ځواکونو په یو وخت د طالبانو پر دواړو غونډو بریدونه کړي چې په پایله یې ۱۲ طالبان وژل شوي دي.
خبرپاڼه زیاتوي د هوايي ځواکونو په دغو بریدونو کې د یادې ډلې یوه قرارګاه، څو عرادې موټر سایکلونه او وسلې هم له منځه تللي دي.
د یو بل خبر له مخې طالبانو وړمه شپه د نيمروز ولايت اړوند خاشرود ولسوالۍ پر ځینې امنیتي پوستو بریدونو کړي دي.
دفاع وزارت وايي امنیتي ځواکونو د طالبانو ددغه برید مخنیوی کړی او په ځوابیه ډزو کې یې ۱۲ طالبان ور وژلي دي.
طالبانو تر اوسه په دې هکله څه نه دي ویلي.