تاند، پنجشنبه د سنبلې ۶: چارواکي وايي د کابل –جلال آباد لاره د سختو سېلابونو راوتو له امله د تګ راتګ پر مخ تړل شوې ده.
د لغمان د والي ویاند اسدالله دولتزی وايي، د کابل –جلال آباد لویه لاره د سېلابونو د راوتلو له امله د ترافیکو پر مخ د کابل د خاکلي تونل مربوطاتو کې بنده شوې ده.
د لغمان ولایتي چارواکي وايي چې د ټولګټو ریاست پلاوی د تخنیکي وسایلو سره سیمې ته رسېدلی څو د لارې په خلاصون کې همکاري وکړي.
ددې تر څنګ د ۲۰۱ سېلاب قول اردو پرسونل هم د کمک لپاره سیمې ته استول شوی دی.
چارواکي وايي، هڅه کوي چې ژر تر ژره لاره د هر راز تګ راتګ لپاره بېرته پرانیستل شي.
دا په داسې حال کې ده چې د وړمې شپې راپدیخوا د هېواد په څو ولایتونو کې د درنو سېلابونو راوتو له امله په لسګونه کسان مړه او ټپیان شوي او سخت مالي زیانونه یې اړولي دي.
دغې طبیعي پېښې خلک وارخطا کړي او له مسؤلو ادارو څخه د عاجلو مرستو غوښتنه کوي.