تاند(جمعه، د اسد ۳۱) د بدخشان د پوهنې رییس، عبدالسمیع ابدیار رسنیو ته وویل چې د شکي دروازې ولسوالۍ د میمي او ناسي ولسوالیو انجونو غوښتل چې د کانکور ازموینه ورکړي ، خو په ناصري ولسوالۍ کې میشتو طالبانو انجونو ته د کانکور ازموینې د ورکولو مخه ونیوله.
په بدخشان کې د پوهنې رییس وايي چې د یادو ولسوالیو څه باندې ۲۰۰ انجونې د طالبانو د خنډونو له امله د کانکور په آزموینه کې پاتې راغلي دي.
ابدیار وايي چې یاده ستونزه د پوهنې او لوړو زده کړو وزارتونو له چارواکو سره مو شریکه کړې ده او د لوړو زده کړو وزارت مشرتابه ډاډ ورکړی چې هغه انجونې چې په بدخشان کې د کانکور په ازموینه کې پاتې شوې وي په متفرقه ازموینو کې شامل کړي.
هرکال په بدخشان ولایت کې، د ولسوالیو د لرې واټن او د ستونزمنو ترانسپورتي لارو له امله، د کانکور ازموینې په څلورو حوزو، فیض آباد ښار، بهارک ولسوالۍ ، شغنان ولسوالۍ او نسي دروازې ولسوالۍ کې اخیستل کیږي.
په بدخشان ولایت کې د کانکور آزموینې پرون پیل شوې او د شنبې تر ورځې به دوام ولري.