تاند، دوشنبه، د اسد ۲۷مه: د افغانستان د ملي روغې جوړې عالي شورا ته نږدې سرچیني وايي، چې ددې شورا رئیس عبدالله عبدالله قطر ته د بین الافغاني خبرو د پیل مراسمو ته وربلل شوی دی.
د دغې شورا مرستیال اسدالله سعادتي وايي ښاغلي عبدالله تر اوسه په دې هکله خپل تصمیم نه دی نیولی.
د ملي روغې جوړې عالي شورا دا خبرې په داسې مهال کړي چې لا تر اوسه د بین الافغاني مذاکراتو د پيل نېټه نه ده په ډاګه شوې.
طالبانو د بین الافغاني خبرو د پیل لپاره د ۴۰۰ بندیانو د خلاصون شرط ایښی دی.
که څه هم ولسمشر اشرف غني د ټولو ۴۰۰ طالب بندیانو د خوشې کولو حکم لاسلیک کړی، خو تر اوسه یې ددغې ډلې یواځې ۸۰ تنه بندیان خوشې کړي دي.
په ورته وخت کې د ملي روغې جوړې عالي شورا د عبدالله عبدالله په حواله په یوه اعلامیه کې ویلي، چې د افغان ولس د ګټو پر ضد به هېڅ راز تصیم ونه نیسي.
ښاغلي عبدالله ویلي، د سولې مشورتي لویې جرګې د افغانانو هیلې منعکسې کړي، پکار ده چې افغان حکومت د سولې په برخه کې ددغې جرګې پرېکړې عملي کړي.
عبدالله طالبانو ته په خطاب کې ویلي، د افغانستان حکومت د سولې په برخه کې خپل ښه نیت ښودلی، نو پکار ده چې طالبان هم د سولې خبرو ته غاړه کېږي او پلمې دې نه لټوي.
ولسمشر غني هم تېره ورځ د ځوانانو د ورځې په مناسبت جوړې شوې غونډې ته وویل، چې د جمهوریت په سر به هیڅکله معامله نه کوي.