ستوري د هر چا دي لوى اسمان د ټولو خلکو دى
پرېږدئ چې اباد وي دا جهان د ټولو خلکو دى
ته يې د خپل ځان غوندې ملا صرف د ځان ګڼې
رب العالمين، رحيم، رحمن د ټولو خلکو دى
نن چې د ګلونو لَو کوي همده پرون ويل
ګل د هېچا ندى ګلستان د ټولو خلکو دى
دا د نوي دور قارون نوې لوبه جوړه ده
ګټه د يو کس ده او تاوان د ټولو خلکو دى
ماته يې لېمو کې د شوخۍ په ژبه وويل
سرې شونډې مې ستا دي سور پېزوان د ټولو خلکو دى
دا ساده کيسه ده فلسفو ته حاجت نه لري
خداى د ټولو خلکو دى، شيطان د ټولو خلکو دى
سيل د لرې لرې وطنونو مرګ د خپل وطن
ستا ندى خټکه دا ارمان د ټولو خلکو دى
راشد خټک، ٢٥ مى، ٢٠١٣
واشنګټن ډي سي
د راشید خټک تازه غزل
ډېر ښکلی غزل دی ډېر ښکلی د اوسني حالاتو د ترجمانۍ دا بیتونه یې ډېر عالي دي..\
ته يې د خپل ځان غوندې ملا صرف د ځان ګڼې
رب العالمين، رحيم، رحمن د ټولو خلکو دى
نن چې د ګلونو لَو کوي همده پرون ويل
ګل د هېچا ندى ګلستان د ټولو خلکو دى
دا د نوي دور قارون نوې لوبه جوړه ده
ګټه د يو کس ده او تاوان د ټولو خلکو دى